|
Guden Dach, Ihr liebe Leit,
ich steh hier bereit
um eich zu erzähle,
wie mir Hausfraue und monchmal quäle.
Ich bin verheirat seit 30 Jahr,
des is traurisch, aber wahr.
Moin Alte macht im Haushalt kään Finger krumm,
er is halt en Monn und es issem zu dumm.
Er mähnt jo aach, dass ich nur deham rumhocke deht
und mir des bißche Haushalt mit links von de Hond geht.
Aach de liebe Sohnemonn
drickt sich vor der Hausarbeit, wo er nur konn.
Doch es is durch Studie erwiese und steht überall gonz klar:
Die Arbeit is gonz schee schwer von ner Hausfraa.
|
 |
Moijends um halber sechs, wenn ich bin außem Bett gekroche,
deck ich de Friehsticksdisch und du de Kaffee koche.
Dann du ich mich in moi Klamotte schwinge
un wenn im Radio die Sechs-Uhr-Nachrichte erklinge,
schmeiß ich donn gonz nett
moi zwar Männer außem Bett.
Wenn die sich donn wäsche und fertischmache
pack ich dene zwaa ihr Sache:
Pausebrot, Zigarette und e Limoflasch
steck ich jedem in soi Arbeitsdasch.
Wen se donn fertisch sind mit ihrer Butzerei,
hocke se sich an de Kaffeetisch und schlinge es Friehstick in sich enei.
Donn krieh ich von jedem noch en Kuss
un donn renne se zum Bus.
Sinn die Zwaa donn außem Haus
geh ich mit em Hund enaus.
Des sinn die Sache, die ich moijends schon so mach un es kimmt noch mehr.
Ja, so e Hausfraa hot´s schon schwer.
|
|
Wenn die Uhr donn zeicht halb acht
wird es Kaffeegescherr weggemacht
Donn streif ich mer moi Kittelscherz übber
un geh mit em Staablabbe ins Wohnzimmer nübber.
Ich mach die Dir uff und mir kimmt entgesche kalte Raach
ich geh enoi und mich trifft bald de Schlach.
De Junior und soi Kumpels habbe gestern obend Video geguckt
und offenbar dodebei aach e paar geschluckt.
Im Wohnzimmer sieht´s aus wie in em Saustall
die leere Flasche steh´n erum überall,
die Aschebescher sinn übervoll!
Die habbe es jo getribbe gonz schee doll.
Ich sach jo nix, wenn de Sohnemonn mol feiert,
aber es muss nit soi, dass mer mir uff de Deppisch reihert.
Als ich mich widder hab gefonge
bin ich an die Arbeit gonge.
Erstmol hab ich die Flasche weggemacht
und glei in de Keller gebracht.
Dann hab ich de Rest noch uffgeräumt
un de Kotzfleck uffem Deppisch oigeschäumt.
Mim Staubsaucher und Putzlabbe gings donn rund.
Ich hab gebutzt gonze zwaa Stund.
In moim Wohnzimmer feiern die Bongert nimmermehr.
Ich sach eich nur, so e Hausfraa hots schon schwer.
|
 |
Ich guck uff die Uhr, es is schon zwonzisch noch zehe,
do wer ich jetzt emol oikaafe gehe.
Es is überall gerammelte voll in de Leede,
heit kaafe die Leit widder mol oi wie die Bleede.
Hab ich donn geholt moi gonze Sache,
du ich mich - bepackt wie´m Esel, uff de Hamwesch mache.
Widder deham, wird erst emol e Zigarett geracht.
des steht mer wohl zu, ich hab mich heit schon genuch geplacht.
Hab ich donn geracht moi Zigarett
geh ich ins Schlofzimmer und mach es Bett.
Donn wird in de Stubb vom Junior noch e bißche saubergemacht
und dodenoch die Wäsch zum Trockne uff de Speicher gebrocht.
Denn wje ich fort war zum oikaafe
is jo die Wäschmaschin gelaafe.
Ich bin aach die einzisch im Haus, die butzt die Trepp,
monchmol komm ich mer vor schon e bißche depp.
bin ich donn fertisch, spir ich mei Knoche nit mer.
Ja, so en Hausfraa hots schon schwer.
|
|
Es is schon uhre vier, ich glaab es nit,
glei stehe moi zwar Männer widder vor de Hitt.
Do komme se aach schon ogewetzt
un ich hab de Kaffee noch nit uffgesetzt.
De Junio geht glei widder fort
und ißt noch nit emol soi Tort
die ich em hab mitgebrocht, des find ich gar nit schee
un es dut mir aach e bißche weh.
Is de Alte donn im Bad gewese,
hockt der sich hie und dut die Zeitung lese.
Während er so in die Zeitung gafft,
freht der mich: "Hoste heit eigentlich schon was geschafft?"
Ich glaab, dass ich nit richtisch her.
Ja, so e Hausfraa hots schon schwer.
|
|
Um sechs Uhr is es die hechst Zeit,
do werds Obendesse vorbereit.
De Alte lässt sich zwischedrin bediene von hinne bis vorn,
des erweckt schon widder moin Zorn.
Doch der hockt uff de Couch und behält voll die Ruhe
un mähnt, ich hätt de gonze Daach sowiso nix zu due.
Wenn ich donn es esse uffahr,
bin ich widder soi lieb Fraa.
Des alles find ich gar nit schwer,
Jah, so e Hausfraa hots schon schwer.
|
|
Mittlerweile is es schon halb acht
un eigentlich bin ich schon fertisch fer die Nacht.
Doch ich muss noch es Gescherr wegmache
und donn bischel ich noch e paar Sache.
Es Kreiz duht weh und moi Bääh sinn schwer wie Blei.
Ich bin donn froh, wenn ich um halber zwölf im Bett drin leih.
Ich denk, de Alte schläft mittlerweil
doch peifedeckel, uff emol wird der geil.
Er is gonz butzisch und seht, er deht mich liebe,
doch ich wääß genau, er will nur e Nummer schiebe.
Uff emol krieh ich aach Lust und mach mich frei,
doch mer habbe kaum ogefonge, do is es aach schon vorbei.
Ham mer dann den Akt beend.
dreht sich moin Gatte uff die Seit und pennt.
Ich lieh noch wahch bin eh bißche benomme,
doch donn dut mich aach de Schlof überkomme.
Moije hab ich widder kää Zeit, mich mol en Aacheblick zu setze.
du wieder hierher, dohie, dorthie wetze.
Trotzdem mach ich des gern fer moin Sohn und moin Monn
weil ich es mer nit mer onnerst vorstelle konn.
Dos es is viel Arbeit un es wird von Dach zu Dach mehr
Deshalb sach ich zum Schluß:
So en Hausfraa hots schon schwer.
Sam am 23.02.01
|
|
|
